Gudbrandsdalen møter Valdres. Vanleg fele og hardingfele inngår partnarskap i duoen Odde & Holmen.
Debutalbum
Repertoaret deira på "Sumarmorgon" er i hovudsak basert på ein smakfull kombinasjon av dei ulike tradisjonsuttrykka dei representerer. Gode soloslåttar frå Valdres og Ottadalen tek sin naturlege plass i ein ny innpakning.
– Denne plata inneheld eit variert utval av repertoar me har nytta sidan me byrja å spela saman, og me håpar at samspelet vårt tilfører dei noko nytt og interessant. – Odde & Holmen
Det duoen kanskje har fått mest merksemd for det siste året er at dei har tatt i bruk musikk av komponist og spelemann Eivind Groven (1901 – 1977). Verdt å nemne er "Regnbogen" og "Springar frå Symfoniske Slåttar" for to hardingfeler – frykta for sin kompleksitet og elska for dei spesielle klangane og harmoniane som Groven er så kjent for.
Årets unge folkemusikarar
Bjørn Kåre og Sivert har kvar for seg utmerka seg som sterke soliastar i folkemusikkmiljøet, både på kappleikar og på konsertscener på forskjellige arenaer. Sivert har mellom anna ved fleire høve vore solist med koret Ad Cantus, både på vanleg fele og hardinfele. Men spesielt har han utmerka seg som ein sterk utøvar av hardingfeletradisjonen frå Valdres. Bjørn Kåre har markert seg som ein svært allsidig musikar. I 2013 vann han Toneprisen, og året etter spelte han "spelemannen" i musikalen "Spelemann på taket" på Det Norske Teatret. Sidan den gong har han livnært seg som musikar, ofte som solist ved forskjellige høve, men og som musikar i kjente grupper som Majorstuen og Lendmenn.
Under Folkelarm 2015 vart Odde & Holmen kåra til årets unge folkemusikarar.
