På “Helgasong” løftar Opheim fram vakre og gløymde julesalmar og folketonar, saman med eit stjernelag av musikarar: Irene Tillung, Mats Eilertsen, Nils Økland og Tore Brunborg.
Albumet Helgasong er ei revitalisering av religiøse folketonar frå Voss, Hardanger, Eksingedalen og Øygarden. Jolesalmar som har vore sunge i Noreg i fleire hundre år, her i lokale variantar og nye arrangement. Den eldre songtradisjonen ligg i bakgrunnen, ei einsleg stemme som syng for seg sjølv, og samsong i gamle stover. Salmetekstar som har betydd mykje for mange og som difor framleis finst. “I djupaste mørker vart himmelen klår”, slik byrjar andre verset på “No koma Guds englar med helsing i sky” av Elias Blix. Advents – og Jolesalmar som fortel oss om at ljoset vert fødd på nytt kvar advent og Jol, ved Vintersolkverv når det er som mørkast i nord.
Berit Opheim fortel:
– Bakgrunnshistoria er eit ynskje om lyfte fram og dela lokale folketonar på jolesalmar som ein del av songtradisjonen i Noreg. Me har funne fleire folketonar i eldre notenedskrifter dei siste par åra, m.a. nedskrifter av Olav Sande. Vakre melodiar som er ein fryd å synga og ein fryd å lyfta fram i nye arrangement.
Nokre av folketonane har ikkje vore brukte på mange tiår og det er difor ei ekstra stor glede å lyfte dei fram or dvalen. Besetjinga består av Irene Tillung, akkordeon, Mats Eilertsen, kontrabass, Nils Økland, feler, Tore Brunborg, saxofon og Berit Opheim, vokal. Alle arrangementa er utarbeida av musikarane i fellesskap, og innspelinga vart gjort i august 2024 i Raundalskyrkja på Voss. Opheim held fram med å fortelje:
– Innspelinga var ein veldig god prosess, gode dagar og lun atmosfære i eit rom med varm akustikk, i trekyrkja i Raundalen på Voss. Instrumenteringa er valt ut frå kva uttrykk me ynskjer i dei ulike songane, og for å få variasjon på albumet. Arrangeringa er nokså felles heile vegen, arrangementa er mykje improvisert fram.
Spelferda for Helgasong byrjar 15.desember i Ål kyrkje, deretter Kabuso, Øystese 16.12., Mariakirken, Bergen 17.12., Vangskyrkja, Voss, 18.12. og 19.12. konsert både i Eksingedalen kyrkje og Dale kyrkje.
Berit Opheim vil setje fokus på hovudbodskapen og avsluttar:
– Uavhengig av kva ein trur på, legg i tekstane, eller kva ein likar, er det mange som kjenner på fellesskap og samhøyrigheit når jolesalmar blir framførde, og når ein er med og syng sjølv. Song skapar ofte eit sterkt fellesskap. Me har eit ynskje om å formidla nærleiken i desse salmane som har vore svært viktig for mange menneske i fleire hundre år. Nært, sårt, storslått, glede og ljos, salmane inneheld alt dette, og “song er dobbelt bøn”. Me håpar det kan bidra til å finna ro og kvile i ei svært uroleg verd.
