Filmtonar frå eit munnspel
Filmmusikk og munnspel
– Da eg valde melodiar til denne samlinga, la eg hovudvekta på kjende filmtema som har vori spela på munnspel gjennom åra. Dessutan tok eg med eit par nyare tema som ikkje blei spela på munnspel i filmane, men som eg syns passar godt for instrumentet. I tillegg inneheld denne CDen eit par av mine eigne melodiar: ein heilt ny, og ein som eg laga for 20 år sidan, men som eg framleis har på konsertrepertoaret mitt. Vidare mine versjonar av melodiar frå skattkista til ein av dei mest markante figurane i vårt hundreår, George Gershwin, som vi feirar hundreårsminnet til nå i 1998, og endeleg ein hyllest til mannen som blei musikalsk inspirasjonskjelde og læremeister for meg, Tommy Reilly, seier Sigmund Groven.
Grovens møte med munnspelet
På plata finst det nesten uskyldsreine, enkle og vakre temaet frå den rørande historia om “Postmannen”, “Il Postino”, og “Reodors ballade” som har eit norsk-folketone-liknande preg, sjølv om komponisten, Bent Fabricius-Bjerre var dansk! Den sjarmerande og originale “Bagdad Café” er ein annan film som mange hugsar, ikkje minst på grunn av melodien “Calling You”. “Motlys”, ein av Grovens eigne komposisjonar, bruker han ofte som opningsnummer på konsertane sine. “Tida går” er splitter ny, ein enkel liten trall av det slaget som kan byrje å surre rundt i hovudet og som nektar å forsvinne før han er nedskriven. – “Firefly” var melodien som forandra livet mitt, seier Groven. Eg var ni år gammal, og sat saman med kameraten min heime i Heddal ein mørk janauarettermiddag og venta på Laurdagsbarnetimen, da eg plutseleg høyrde desse fantastiske tonane som strøymde ut frå radioapparatet: Tommy Reilly som spela “Firefly”. Frå da av var eg munnspelentusiast, og Tommy Reilly-beundrar!
Eldre og nye klassikare
Ein av dei legendariske komponistane i den store klassiske Hollywoodtradisjonen var russiskfødde Dimitri Tiomkin. Her kan du høyre Tiomkins nostalgisk lengtande song “The Green Leaves of Summer”. Ofte går filmskaparane til dei store komponistane frå farne tider for å finne musikk som skal skape den rette atmosfæren. Den vakre melodien som blei brukt i filmane “Jean de Florette”, “Kilden i Provence”, er eigentleg frå operaen “Skjebnens makt” av Giuseppe Verdi. Mykje av George Gershwins musikk kler munnspelet svært godt, og her har Groven henta fram to av dei mest kjende songane frå operaen “Porgy and Bess”: voggesongen “Summertime” og den røffare “It ain´t necessarily so”. Filmkomponisten Henry Mancini brukte munnspel i musikken til filmen “Frokost hos Tiffany´s”, og “Moon River” blei snart ein klassikar. Av enda eldre dato er temaet frå ein fransk kriminalfilm, “Le Grisbi”, ein original fransk blues. John Barry er ein av dei få engelske komponistane som har fått kultstatus. Til Hollywood-filmen “Midnight Cowboy” laga han eit originalt munnspeltema. Hovudtemaet frå Titanic i eit spennande arrangement av Bjørn Ole Rasch set punktum for denne samlinga med munnspelet som musikalsk midtpunkt og med mange gode hjelparar rundt!
Sigmund Groven
